Make your own free website on Tripod.com
Left Circle WBS Title
 
APAAN NIH?   Benda apaan sih ini nih...

Benda ini bisa ente pake, kalo ente misalnye punye Warnet atawa Rental komputer sebage tempat usahe ente. Jaman dulu, waktu gue pertame dikasi kerjaan suru nyet-ap satu warnet di bilangan Tenabang, gue puyeng nyari perabot buat nagih kastemer. Gue coba-coba beberape program, n sip.. ada nyang gue suka. Tapi *SePaTu KeJeBuR GoT!* --mahal banget sih biayenye?

Alabuset dah.. baru juga abis juragan gue duitnye buat bayar komputer ke si Aseng, eh gue minta siapin lagih duit buat beli billing ginian, ya puyeng aja deh dia.

Akhirnye sekitar dua mingguan anak buahnye juragan gue ngitung tagihan ke kastemer pake manual. Tiap ade kastemer dateng, die catet jam ame menitnye, trus entar kalo si kastemer udahan, die itung berape lame si kastemer maen nyewa komputernye. Abis itu diitung deh.. kalo kurang dari setengah jam, dimasukin ke setengah jam. Kalo lewat dari setengah jam, dimasukin ke 15 menit seabis entu. Abis itu baru deh dikaliin sampe biaya sejam nginternetnye, jumlah duitnye ditagihin ke si kastemer.

Pertame-tame sih pas kastemer masih sedikit, lancar aje. Tapi begitu kastemer dateng keluar masuk puyeng juge nih temen gue. Udeh gitu si kastemer juge kesian. Ade yang dateng bela-belain bawe jam stop-watch. Nggak yakin kali si kastemer nyang satu eni ke temen gue. Kan kesian juga tuh dua-duanye. Ya kastemernye, ya temen guenye. Ye udeh, akhirnye gue putusin bikin sendiri aje deh. Nggak usah dibayar ama juragan gue juge gak ape ape. Abis gue juge mau bisa bikin nyang gini-ginian.

Akhirnye gue di kantor kalo lagi lowong (jem makan siang atawa jem abis pulang kantor), gue ngutek-ngutek aja bikin program konek-konekan make TCP/IP socket. Dan gue mo bilang ama elu, ini program dibikin pake Delphi 5 Profesional nyang legal, hehehehe. Jadi elu jangan ngerasa berdose gare-gare ngerase ini mungkin dibikin pake program bajakan. It's Legal. Hehehehe.. Ya uda deh gitu aje. Pokoknye ini benda bisa elu pake buat ngitung-ngitung berapa duit yang mo lo tagih ke rentalan elu.

Detil soal ini benda bisanye ape aje bisa elu temu'in di halaman Guna'nye.